လှောင်ချိုင့်ထဲကငှက်
စိတ်မှတ်နဲ့ ခရီးထွက်တယ် ။
နရသိန် စစ်အကျဉ်းစခမ်းထဲက
ရှစ်ပေ ဆယ်နှစ်ပေ ငရဲလှောင်အိမ်မှာ
ကျနော့် ခန္ဓာကိုယ်ဟာ
စိတ်နဲ့မကြာခဏ ခွဲခွါနေခဲ့ရပေါ့ ။
ပုံစံနဲ့သွား
ပုံစံနဲ့စား ပုံစံနဲ့နေ
ဆင်ချေဆိုတာမရှိ
သံခြေချင်းနဲ့စစ်ခွေးတိုက်
တိုက်ပိတ် နှိပ်စက်
လူ့အသက်ဆိုတာ
ဘာတန်ဖိုးမှ မရှိအောင်
မှောင်လိုက်တဲ့ လူ့ငရဲ
အဲဒီ အမှောင်တိုက်မှာပဲ
လောကဓံနဲ့တိုက်ခိုက်နေလျှက်
ခေါင်းငိုက် ဦးညွှတ်ဖို့ရာ
ကျနော့်စိတ်မှာ
ပါမလာခဲ့ဘူး အမေ ။
ကျနော့်စိတ်က
အမေ့အိမ် တစက်မြိတ်အောက်
ဝါးရေတံလျှေက်လေးထဲက
ကျလာတဲ့ရေကို
အမေထမင်းချက်ဖို့ ရေခံနေတတ်တယ်။
ကျနော့်စိတ်က
လူငယ်ဘ၀ လ္ဘက်ရည်ဆိုင်ထဲမှာ
ငယ်သူငယ်ချင်းတွေနဲ့အတူရှိနေတတ်တယ်။
ကျနော့်စိတ်က
အဖေအမေနဲ့အတူရှိနေတဲ့
ညီမလေးအဖြေထုပ်ဖို့ခက်နေတဲ့
ပုဒ်စာတပုဒ်ကိုတွက်ပေးနေတတ်တယ်။
ကျနော့်စိတ်က
တောကြိုအုံကြားက
စစ်ထွက်သွားနေတဲ့ ကျောင်းသားစစ်သည်
ညီအကိုနှစ်ဦးရဲ့နဘေးမှာ
ဒေါင်းစစ်ချီတေးကို
သီကြွေးနေတတ်တယ်။
ကျနော်တို့ဟာ
လူဖြစ်ခွင့်ရလျှက်
လူ့အသက်ကိုမရတဲ့သူတွေအတွက်
မျှော်လင့်ချက်ဖြစ်တယ်။
ကျနော်တို့ဟာ
ငတ်မွတ်ခေါင်းပါးနေတဲ့လူတွေအတွက်
အစာရေစာဖြစ်တယ်။
ကျနော်တို့ဟာ
အမှောင်ကမ္ဘာထဲကလူတွေအတွက်
အလင်းတစက်ဖြစ်တယ်။
အမေက
သားတွေကို အားကိုးတယ်တဲ့။
တကယ်တော့အမေဟာ
ကျနော်တို့တတွေကိုထုဆစ်ထားတဲ့
သစ္စာတရားပေါ့။
အမေ
ကျနော့်လွယ်အိပ်ထဲက ကံ့ကော်ပွင့်ခြောက်လေးကို
အမေ့ခေါင်းအုံးအောက်မှာ တယုတယသိမ်းလို့
အမေ့ဓမ္မတေးနဲ့ ငြိမ်းပါစေ။
အမေရေ
ဟောဒီ သံတိုင်တွေရဲ့နောက်က
တမိုးသောက် လွတ်မြောက်လာတဲ့အခါ
ကျနော်အမေ့အိမ်ဆီ အရောက်ပြန်လာခဲ့မယ်။ ။
No comments:
Post a Comment