ငှက်ရေ...
သစ်ပင်တပင်လုံး
အရွက်ဆိုလို့ 
တရွက်မှမရှိတော့ဘူး။
မြေကြီးအောက်
တောက်ပတဲ့အမြစ်တွေသာ
ရုန်းကန်တုန်းပေါ့။
မင်းသေသွားတာကောင်းတယ်
ငှက်။
နို့မို့ရင်
မင်းသီချင်း ‘‘အဆုံးသတ်တိုက်ပွဲ”
မူးမူးနဲ့အော်နေတဲ့ငနဲတွေ
မင်းဆဲမိနေဦးမယ်။
မင်းဆိုးမင်းညစ်တို့လက်မှာ
သေသူကို
ရှင်သူ မနာလိုဖြစ်သတဲ့။
ဖြစ်မပေါ့
သေသူတွေက
နာမည်ကောင်းနဲ့သေသွား
မြေကြီးထဲ
ဘယ်တော့မှသစ္စာမဖောက်။
ရှင်သူတွေသာ
မထင်မှတ်ဘဲ
တယောက်ပြီးတယောက်
သစ္စာဖောက်သွား
မသေခင်
နာမည်ဆိုးနဲ့ပျောက်သွား။
ဒီနေ့က
တိုက်ပွဲမလို
ပူးပေါင်းဆောင်ရွက်ဖို့သာလိုသတဲ့။
ခေတ်ကြီးထဲ
တဝုန်းဝုန်းခုန်ချ
အတုံးအရုံး
ကြွေပြနေလိုက်ကြတာ
သစ်ပင်တပင်လုံး
အရှိုးရာတွေချည်းပါလား။
ငှက်ရေ...
သူတို့ပဲ သူရဲကောင်း
သူတို့ပဲ သစ္စာဖောက်။
မြွေပွေးကိုက်တုန်းကမသေ
မြက်ရှောပတ်မှသေကြ
မတတ်နိုင်ဘူး။
မသေခင်
ပျောက်ဆုံးနေတဲ့အနာဂတ်ကိုတော့
တွေ့အောင်ရှာရဦးမယ်။
အမေဇုန်မြစ်ကြီးရဲ့
အောက်နက်နက်မှာ
နောက်ထပ် အမေဇုန်မြစ်ကြီးတစင်း
ရှိနေတယ်ဆိုတာ
(မြေကြီးအောက်က)
မင်းအသိဆုံးပေါ့ကွာ။
ငှက်ရေ...
မင်းသေသွားတာကောင်းပါတယ်။
မြေကြီးအောက်မှာပဲ
စိမ်းစိုတဲ့အမြစ်တွေနဲ့
ဒို့ခေတ်ကိုရောက်နှင့်နေဦးပေါ့ ညီလေးရာ။ ။
(ထူးအိမ်သင် ကွယ်လွန်ခဲ့တဲ့ ၁၀ နှစ်ပြည့် အမှတ်တရ)
အောင်ဝေး
သြဂုတ် ၁၃၊ ၂၀၁၃
No comments:
Post a Comment